Shkrimtarja e mirënjohur, Lea Ypi ka arritur të triumfojë në ceremoninë e ndarjes së çmimit “Lumo Skëndo”.
Me veprën “Të lirë” autorja ka arritur të përcjellë me sukses konceptin e lirisë në kohën e diktaturës komuniste dhe të tranzicionit demokratik në Shqipëri. ‘E veshur’ me vlera të shquara në trajtesën origjinale, artistike e filozofike shkrimtarja ka arritur të ndajë me lexuesit e shumtë një rrëfenjë nëpërmjet kujtimeve të fëmijërisë dhe adoleshencës së saj.
Këtë eksperiencë trazicioni ideologjish, Ypi e ka dhënë me vërtetësinë, sinqeritetin, ndjeshmërinë, humorin, meditimin politik e filozofik bashkëkohor, veçori të cilat zënë vend në penën e autores.
Krahas saj në garë ishin dhe autorë si Fatos Lubonja me librin e tij të fundit “Jetë burgu”, Rubens Shima me “Posteri shqiptar”, Fatmir Toci me “Arbëreshët” dhe Kujtim Shala me “Zbulimi I Zef Pllumit”.
Në ceremoninë e ndajres së çmimit “Lumo Skëndo”, ishte prezente dhe ambasadorja e SHBA-ve, Yuri Kim.
Kush është Lea Ypi, shkrimtarja e njohur e cila ka pasuruar artin shqiptar nga pikëpamja politike dhe më gjerë
Lea Ypi është një autore dhe akademike shqiptare. Ajo është profesoreshë e teorisë politike në ‘London School of Economics.’
Interesat kërkimore të Ypit janë në teorinë politike normative (përfshirë teorinë demokratike , teoritë e drejtësisë dhe çështjet e migrimit dhe të drejtave territoriale), mendimin politik iluminist (veçanërisht Kant ), Marksizmin dhe teorinë kritike , si dhe historinë intelektuale të Ballkanit , veçanërisht vendlindja e saj, Shqipëria.